Kijana Wa Kiislam

UFUNGUZI WA KONGAMANO LA HISTORIA YA UISLAMU AFRIKA MASHARIKI

 

NA RAMADHANI ALI/HABARI MAELEZO ZANZIBAR         

Rais wa Zanzibar na Mwenyekiti wa Baraza la Mapindizi Dkt. Ali Muhammed Shein amesema Historia inaonyesha kuwa Zanzibar imechangia sana katika kukuza na kueneza ustaarabu wa kiislamu katika maeneo ya Afrika Mashariki.

Amesema Masheikh na Maulamaa wa Zanzibar  walikwenda kueneza Uislamu katika maeneo  ya Ukanda huo na wengine walifika visiwa vya Comoro  na nchi nyengine za Afrika ya Kaskazini na baadhi ya nchi za Asia.

Dkt. Shein ameeleza hayo alipokuwa akifungua Kongamano la Kimataifa kuhusu Historia ya Ustaarabu wa Kiislamu katika nch za  Afrika Mashariki linalofanyika katika Hoteli ya Lagema, Nungwi, Mkoa wa Kaskazini Unguja.

Amesema anaamini kuwa kutokana na Historia  na vigenzo  vyengine vingi ndio viliopelekea Mamlaka ya Kumbukumbu na Nyaraka ya Falme  ya Oman kuichagua Zanzibar kuwa mwenyeji wa kongamano hilo la Kimataifa la kiislamu kwa nchi za Afrika Mashariki.

“Kwa hakika Zanzibar ndiyo kitovu cha Historia ya Ustaarabu wa Kiislamu katika nchi za Afrika Mashariki, hivyo kuichagua Zanzibar kuwa mwenyeji wa kongamano hili ni pahala pake,”alisisitiza Dkt. Ali Muhammed Shein.

Amongeza kuwa yapo maelezo ya kihistoria yanayoeleza kwamba msafara wa viongozi wa dini ya kiislamu ukiongozwa na Sayyid Jaffar bin Abu Talib waliingia Zanzibar na kufikia kijiji cha Ndagoni Pemba kabla ya viongozi wengine wa dini kuingia Madina.

Amesema  lugha ya Kiswahili imekuwa chombo muhimu cha   kueneza na kuendeleza ustaarabu na mafundisho mengine ya dini ya kiislamu kupitia mawaidha, darsana pia tafsiri za vitabu vya dini ya kiislamu katika ukanda wa Afrika Mashariki.

 Rais wa Zanzibar na Mwenyekiti wa Baraza la Mapinduzi amesema kuwa ithibati ya kuingia dini ya kiislamu Afrika Mashariki katika karne ya tisa  ni  mabaki ya baadhi ya misikiti iliyojengwa katika karne ya kumi na kugunduliwa kwenye baadhi ya maeneo ya miji ya kale ya Zanzibar ikiwemo Unguja Ukuu Kae Pwani kwa Unguja na Mtambwe mkuu kwa upande wa Pemba.

“Kadhalika  msikiti mkongwe wa Kizimkazi Dimbani ni kumbukumbu isiyo na shaka, inayobainisha wazi kuwa Zanzibar  ilikuwa na idadi kubwa ya waumini wa dini ya kiislamu katika kipindi cha mwishoni mwa karne ya 11 AD na kuingia karne ya  12 AD,”alisema Rais  Shein.

Amebainisha Uislamu unafaida kubwa katika kuimarisha na kuendeleza Utamaduni na maisha ya kila siku na umekuwa ukijitokeza katika masuala mbali mbali yakiwemo mavazi, malezi, vyakula, elimu, sheria na utawla, shughuli za mazishi ndoa na hata sanaa katika ujenzi wa nyumba za kale.

Dkt. Ali Muhammed Shein ameeleza  kuwa Serikali ya Mapinduzi ya Zanzibar inatambua mchango muhimu unaotolewa na Taasisi za kidini na ndiyo sababu ya kuanzisha Ofisi ya Mufti kusimamia masuala ya kidini ikiwa ni pamoja na kuziendeleza madrasa na kuyaendeleza malezi ya watoto.

Amesisitiza haja ya kuimarisha Umoja na kuepuka mifarakano katika jamii na pia amewataka waumini wa dini ya kiislamu kuishi vizuri na waumini wa dini nyengine duniani kote.

“Uislamu ni dini ya amani  na kwa hakika mifarakano na vitendo vinavyohatarisha amani na Ustawi wa Jamii si sehemu ya Ustaarabu wa Kiislamu.” alisisitiza Rais wa Zanzibar.

Rais wa Zanzibar amelitaka kongamano hilo liwe chemchem ya tafiti zaidi za Historia ya Ustaarabu wa Kiislamu Afrika Mashariki na kuzingatia uwezekano wa kuanzisha kituo cha Historia na Utamaduni wa Kiislamu Zanzibar.

Akizungumza katika Kongamano hilo Katibu Mkuu wa Jumuiya ya Nchi za Kiislamu Duniani (OIC) Dkt. Emeleddin Ihsan amesema uislamu ni dini inayosisitiza amani na maelewano duniani.

Hata hivyo a mesema hivi sasa imezuka dhana  ya kupigwa vita na kuonekana kama ni dini  hatari inayozalisha magaidi  jambo ambalo sio la kweli.

“Dini ya kiislamu inapinga ugaidi na ni dini ya usalama inayosisitiza amani na maelewano ili kuishi kwa usalama duniani kote  hivyo  tusikubali baadhi ya watu wanaoipiga vita dini hii, ”Dkt. Ihsan alisema.

Kongamano hilo la siku tatu linatarajiwa  kumalizika Jumatano ijayo ambapo Waziri Mkuu wa Jamhuri ya Muungano wa Tanzania Dkt. Muhammed Gharib Bilal atakuwa mgeni rasmi siku  ya ufungaji.